Rom 9 | MHL | STEP | Aria yo aakisa opora maiyem fain Krais unuma-pa makena maiyem, me nia sailowiyem. Ne Ewar Eliwa pun yo efamiya ikaeya yena uroma, kema pun makena maiya.

Romans 9

Mua Maneka ona kookalowa ookiya

1 Aria yo aakisa opora maiyem fain Krais unuma-pa makena maiyem, me nia sailowiyem. Ne Ewar Eliwa pun yo efamiya ikaeya yena uroma, kema pun makena maiya. 2 Feenap, i Isrel eena yena kerekera unowa wi Yeesus Krais mikikira iwemi opora me wiar opimik. Naapeya yo wi muuta nain kema samorariyem. Yo kema moke wia ikok maiyem, “Wi muuta nain yo Krais wameiya ikem fain efa iirarekak oo. Naeya wia aaweya eliwa ikekamik,” naap maiyem. 4 Aria i Isrel-na Mua Maneka-ke iiriw ona muuka yia arowak. Neemi ona unum maneka ne parin maneka ariman yia wuomaya wiar urufamik. Ne o ona maa kamenap kookaliya nain i yia maakemi opora nain koonowak. Ne sira pun unowa yiemi lotu onowa sira makena yia ofakowak. Ne oko pun feenap yia maakek, “Yo anane nia asipam-ikainen, ne opor unowa nia maakem nain makena urufowen,” yia naek. 5 Ne i nembesir awona teeria unum maneka. Ne pun Krais eena miiwa orok nain kerekera nan imenarek. O eena Mua Maneka Iinan Akena-ke, maa muutitik os-ke urufiya. Naeya i anane o unuma purupowa-ke ikua. Makena.

6 Aria i Isrel papako Yeesus opora me wiar opiwkin feenap maiyen-i? Mua Maneka opora i Isrel yia maakep koonowak nain makena me arek, naap maiyen-i? Weetak. Yo naap me maiyem, makena i Isrel unowa, nain Mua Maneka me unowiya maneka Isrel teeria makena-ke wia naiya. 7 Ne oko feenap, makena mua unowa yiena nembesir Abraham aka-pa imenaremik, nain Mua Maneka me wi unowiya maneka Abraham muuk teeria akena-ke wia naiya. Ona opora siisimep-puamik nain feenap, ona Abraham maakek,

“Ikoka nena muuka Aisak-pa niimasip ne nembesir teeria imenariya nain nena nembesir teeria akena-ke.”
(Yenesis 21.12)

8 Naeya iiriw Mua Maneka Abraham muuka iwekam naep maakek,

“Mokom oko-pa yo nainiw ekapinen nain nena emeria Sara muuka onaiya ikainon.”
(Yenesis 18.10,14)

Aria nain feenap maiyem, makena Abraham ona muuka wia imenak nain unowa, ne Mua Maneka o muuka iwowa maakeya wiar imenarek, nain makena, ne muuka kuisow nan kaka manekarek nain Abraham ona nembesir teeria akena-ke wia naimik.

10 Ne me nain muutiw, yiena nembesir Aisak muuka pun naap wia pepekimok. Feenap, Aisak emeria Rebeka uroma wuap wapen maawa muukarek nain erup muukarek. 11 Nain wi onak uroma-pa wiar ikaiwkin Mua Maneka-ke onak wiar maakek, “Ikoka iperowa-ke kapa nain tepak-pa wiar ikok opora wiar miimam-ikainon.” Wi onak uroma-pa wiar ikemik nain wiena sira-ko me wiar amisaremik, mua naareke sira eliwa ne naareke samora. Nain Mua Maneka ona kookalowa-pa mua naap wia pepekimiya. Me wi maa mauwa oniwkin wia kookalep wia pepekimiya, weetak. Ona kookalep wia pepekimiya. 13 Moram ona opora ikua nain, ona feenap maek,

“Yena kookalowa-pa Yekop pepekimem, ne Iso wia.”
(Malakai 1.2-3)

14 Naapeya feenap eliw maiyen-i? Mua Maneka sira eliwa me oniya. Naap-i? Weetak, i naap maowa-ko me ikua. 15 Moram o iiriw Moses feenap maakek,

“Yo wi mua pina me wiar kema suuwap wia saliwiyem nain yena kookalowa-ke, ne wi mua wia kemaliyem nain pun yena kookalowa-ke.”
(Eksodas 33.19)

16 Aria naapeya maiyem, Mua Maneka eena mua yia pepekimiya nain me mua nain ona kookaleya pepekimiya, ne pun me mua uuwowa kerew oneya pepekimiya, weetak. Mua Maneka ona mua kain kemalep saliwekam naep ona kookalowa-pa naap oninon. Aria Mua Maneka maa muutitik ona kookalowa-pa oniya. 17 Moram ona opor ara oko feenap ikua, iiriw ona Moses sesekeya ikiwep Isip owow saria Fero feenap maakek,

“Mua Maneka-ke feenap maek, ‘Yo fain naep owow saria nefa wuam. No emin kekaneya yoowa niemi maa sira-sira imenamkun yo kekanowa owow unowa efar urufikuan. Neemi miiw unowa owow unowiya yo unuma manekaremi epa fiifinarinon.’”
(Eksodas 9.16)

Mua Maneka-ke naap maakek. 18 Naapeya feenap maiyem, Mua Maneka ona kookalep mua kain saliwinen naiya nain mua nain saliwiya. Ne mua emin kekaniya nain emina iiwawun kekaninok nainon-na eliw naap oninon. Ona kamenap oniya nain eliw oninon.

19 Aria ni mua oko-ke opora feenap kiripowen, “Aa-na Mua Maneka sira naap yia oniya nain moram naep opora-pa yia wuinon? Naap nain mua-ko Mua Maneka kookalowa eliw wiar fieninon-i?” 20 Ni naap me maeka. Ni miiw mua-ke, ni Mua Maneka naap maowa-ko me ikua. Feenap, mua-ko miiwa-pa amina sirareya amina-ke kiremi feenap me maakinon, “Yo moram naap efa onan ya, feenap efa sirarekan-na eliw.” Ni Mua Maneka naap eliw maakowen-i? Me pepek. 21 Mua ona kookalowa-pa maa sirariya nain ona maa-ke. Ona kookalep miiwa-pa amina sira-sira sirarinon. Papako uuwow mane-maneka-pa maa uupowa ne papako ona anane maa uupowa wuinon. Nain ona kookalowa, maken-i?

22 Sira naapiw, Mua Maneka ona kookalep naap wia oniya. Feenap, wi Isrel ikoka yena kekanowa ne bagiaw baliwep efar urufuk naek, nain wi mua wia samorowa nain ewur me wia samorak. 23 Moram wi mua papako wia kemalep wia saliwami yena unum maneka ne parina-pa wia wuinen naek. Wi eena ona iiriw wia nanikeya o wameiya-pa wiar ikok unum maneka ne parin maneka-pa wiar ikaikuan, wi nain. 24 O ona mua wia kemalep wia aawep ona teeria-pa wuak, nain i fanemik. I teeria papako Yuuda mua-ke ne papako wi owow oko oko mua-ke. 25 Wi owow oko oko mua wia aawok nain iiriw ona opora maeya ona profet Hosea-ke kakeniw naap siisimep-puak. Feenap,

“Wi emeria mua iiriw yena teeria-pa me efar ikemik, nain aakisa yena teeria-ke wia naiyem. Aria iiriw me wia kookalem-ikem nain feenap wia nainen, ‘Aakisa yo nia kookaliyem.’”
(Hosea 2.23)

26 Ne opora oko pun feenap,

“Mua Maneka-ke iiriw owowa nain wia maakek, ‘Ni me yo teeria-ke.’ Ne wia, ikoka owowa nain feenap wia maikuan, ‘Ni Mua Maneka anane ikaiya nain muuk teeria-ke.’”
(Hosea 1.10)

27 Aria iiriw profet Aisaiya pun naap, wi Isrel opora manekap feenap wia maek,

“Makena, wi Isrel emeria mua unow akena, ifer pona saa saarik kerew akena ikemik. Nain Mua Maneka-ke wia samorami mua papako muutiw wia aawinon ne unowa weetak.
28 Moram miiw mua wia samorowa maek nain ookami ewursow iiwawun maneka naap onap-puinon.”
(Aisaiya 10.22-23)

Aisaiya-ke naap maek. 29 Ne maa unowa iiriw Aisaiya maek naap imenarek, feenap,

“Mua Maneka eena kekanowa akena nain i Isrel yia samorami mua papako me yia piipuekak-na owow onaiya iiwawun mesenalekamik, iiriw wi Sodom ne Gomora wia samorak naap.”
(Aisaiya 1.9)

Yeesus opora wiar opamkun Mua Maneka mua kaken eliwa yia nainon

30 Naapeya i kamenap maiyen, makena wi owow oko oko feenap-ko me maimik, i Moses sira ookamkun Mua Maneka-ke mua kaken eliwa yia nainok. Nain wi Yeesus Krais opora wiar opiwkin Mua Maneka-ke mua kaken eliwa wia naek. 31 Aria i Isrel-na Mua Maneka mua kaken eliwa yia nainok naep Moses sira wiar ookowa kekan-afurimik. Nain wi unow akena oro-boonemik, nain onoma feenap, wi feenap maimik, “I Moses sira ookamkun Mua Maneka-ke mua kaken eliwa yia nainok.” Ne wi feenap me maimik, “I Yeesus opora wiar opamkun Mua Maneka-ke mua kaken eliwa yia nainok.” Naapeya wi feenap saarik, nomona-ko nan ikua, nain eena wia asipowa nain wiena-keriw ikiwemi nan meren miira kofap wakiemik. Naeya Mua Maneka opora Krais maemi pepek maek, feenap, Mua Maneka-ke maek,

“Ni miimeka, yo ikoka Saiyon ema-pa nomona neeke wuamkun wi soomaremi nomona neeke merena mikap wakikuan. Ne mua eena nomona naiyem nain opora wiar opimik, wi nain-ke emina me ururikuan, wi siisia urufap kemelikuan,”
33 (Aisaiya 8.14, 28.16)